>>Saytın köhnə xəbər və görünüşü << >>Bizimlə əlaqə<<
Son Xəbərlər

Novxanı torpaqlarını kimlər və niyə zibilxanaya çevirir… ACINACAQLI MƏNZƏRƏ

Novxanı torpaqlarını kimlər və niyə zibilxanaya çevirir… ACINACAQLI MƏNZƏRƏ
Abşeron rayonu, Novxanı kəndinin ərazisində hektarlarla torpaq sahəsi zibilxanaya çevrilib. Kəndin ətrafındakı boş ərazilərə maşınlarla zibil daşınıb tökülür və bu da münbit, amma istifadəsiz əkin sahələrinin həm ekoloji baxımdan çirklənməsinə, həm dəyərdən düşməsinə səbəb olur.
Sakinlər virtualaz.org saytına bildiriblər ki, ərazi qəsdən yararsız hala salınır və bu işin arxasında torpaq dəllaları dayanır. Çünki Abşeron Rayon İcra Hakimiyyəti və Novxanı bələdiyyəsininin dəllalları bu torpaqların zibilliyə çevrildiyini bəhanə edərək sahiblərindən dəyər-dəyməzə, 1 sotunu 300-500 manata almağa nail olurlar. Torpaq “qəpik-quruşa” satılan kimi tullantılardan təmizlənir, bölüşdürülərək ev tikmək istəyənlərə dəfələrlə baha satılır.
Novxanı torpaqlarını kimlər və niyə zibilxanaya çevirir… ACINACAQLI MƏNZƏRƏ
Əməkdaşlarımız şikayəti araşdırmaq üçün Novxanı kəndində olublar. Məlum olub ki, hektarlarla ərazidə doğrudan da zibil tullantıları qalaqlanıb. Sakinlərin sözlərinə görə, dəri və bağırsaq sexinin, sallaqxanaların, kafe və restoranların tullantıları bura atılır. Üfunət iyi bir yana, ərazi sahibsiz heyvanların məskəninə çevrilib.
Novxanı kəndinin ərazisindəki bu zibilliklə bağlı Apşeron rayon İcra Hakimiyyətinə dəfələrlə zəng vursaq da cavab verən tapılmadı. Novxanı bələdiyyəsi ilə danışmaq cəhdimiz də baş tutmadı. Amma Abşeron rayon İcra Hakimiyyətinin Novxanı kənd inzibati ərazi dairəsi üzrə nümayəndəsi Elnur Əliyevlə əlaqə saxlaya bildik.
Novxanı torpaqlarını kimlər və niyə zibilxanaya çevirir… ACINACAQLI MƏNZƏRƏ
Elnur Əliyev problemlə və çəkdiyimiz fotoşəkillərlə tanış olandan sonra bildirdi ki, həmin ərazi Novxanı-Fatmayı-Mehdiabad kəsişməsində, “Qotur su” adlanan gölməçənin ətrafındakı çöllükdür. “Ərazi sakinlərin pay torpağı deyil, boş sahədir. Amma yenə də qəsdən zibilxanaya çevrilməsi inandırıcı deyil. Mən bu deyilənlərə inanmıram”, -Əliyev bildirib.
Əliyev onu da qeyd edib ki, tullantıların daşınması ilə Novxanı bələdiyyəsi məşğul olur, bələdiyyənin isə cəmi 2 zibil maşını var.
Novxanı torpaqlarını kimlər və niyə zibilxanaya çevirir… ACINACAQLI MƏNZƏRƏ
“Mən bu vəzifəyə 1 ay əvvəl təyin edilmişəm, amma Novxanıdan olduğum üçün kəndə bələdəm. Ötən həftə sanita-gigiyena həkimləri ilə birgə reyd keçirdik. Təkcə iki ərazidə tullantıların vaxtında daşınmadığının şahidi olduq. Həmin ərazilər isə dərhal təmizləndi”-icra nümayəndəsi bildirib.
Əliyev sakinlərin şikayəti ilə bağlı araşdırma aparacağını və əgər zibillərin həmin əraziyə atıldığı təsdiqlənərsə tədbir görüləcəyini əlavə edib.
Ülviyyə Xudiyeva
Virtualaz.org